បុគ្គលិក៩ប្រភេទដែលងាយនឹងត្រូវបានបញ្ឈប់ពីការងារ

គ្រាន់តែចាប់ផ្តើមត្រីមាសដំបូងនៃឆ្នាំថ្មីនេះ ក្រុមហ៊ុនរបស់អ្នកបានប្រកាសថា ក្រុមហ៊ុនរកស៊ីខាតអស់ប្រាក់ជាច្រើន អ្នកក៏បានលឺដំណឹងថា ផ្នែកផ្សេងៗក្នុងក្រុមហ៊ុនរបស់អ្នកបានបញ្ឈប់បុគ្គលិកជាច្រើននាក់ហើយស្រាប់តែអ្នកឃើញមេរបស់អ្នកកាន់បញ្ចីឈ្មោះបុគ្គលិកចូលក្នុងការិយាល័យរបស់គាត់។ ពេលនោះខួរក្បាលរបស់អ្នកពោរពេញទៅដោយគំនិតមួយថា «តើខ្ញុំត្រូវមេបញ្ឈប់ដែរឬទេ?» ។

បើយើងសម្លឹងមើលទៅក្នុងសម័យវិបត្តិសេដ្ឋកិច្ចពិភពលោកធ្វើអោយបណ្តាក្រុមហ៊ុននានា សម្រេចចិត្តបញ្ឈប់បុគ្គលិកយ៉ាងច្រើនលើសលប់ដែលមិនធ្លាប់មានក្នុងប្រវិត្តសាស្រ្ត។ នៅពេលដែលក្រុមហ៊ុនមួយត្រូវកាត់បន្ថយបុគ្គលិកដើម្បីជួយដល់សេដ្ឋកិច្ចក្រុមហ៊ុនគឺតម្រូវឲ្យកំណត់អោយបានច្បាស់លាស់ថាផ្នែកណាមួយ ឬតំណែងណាមួយដែលមិនមានផលប្រយោជន៍សម្រាប់ក្រុមហ៊ុនក្នុងពេលអនាគត ។

តោះ! យើងមកសាកមើលថាតើនិយោជិកប្រភេទណាខ្លះដែលងាយរងគ្រោះ និងងាយត្រូវគេបញ្ឈប់ពីការងារ?សង្ឃឹមថាអ្នកមិនមែនស្ថិតនៅក្នុងប្រភេទណាមួយក្នុងចំណោម៩ប្រភេទខាងក្រោមនេះទេ ។

 

១. តំណែងដែលមិនមានភាពចាំបាច់ក្នុងពេលអនាគត

យើងត្រូវទទួលស្គាល់ថាមុខតំណែងមួយចំនួនធំនឹងលែងមានសារៈសំខាន់ក្នុងពេលអនាគត។ មុខតំណែងខ្លះអាចនឹងបានកាត់បន្ថយ ទៅតាមកត្តាមួយចំនួនដូចជា ការហូរចូលនៃបច្ចេកវិទ្យាដែលអាចប្រើជំនួសកម្លាំងពលកម្ម បុគ្គលិកថ្មីៗព្រមទទួលយកប្រាក់បៀរវត្សន៍ទាបជាងបុគ្គលិកចាស់ៗ ។ល។ នៅក្នុងការធ្វើការស្រាវជ្រាវមួយរបស់ អង្គភាព Global Research​​បានបង្ហាញថា ១៤ លានតំណែងក្នុងពិភពលោកកំពុងប្រឈមមុខនឹងហានិភ័យដែលនឹងត្រូវកាត់បន្ថយ ដែលមានការប្រកួតប្រជែងពីនិយោជិកនៅតាមបណ្តាប្រទេសនានាដែលព្រមទទួលយកប្រាក់បៀរវត្សន៍ទាប ។

បើយោងតាមរបាយការណ៍ដដែលនោះបានគូសបង្ហាញថា គ្រាមុន បុគ្គលិកផ្នែកជួបអតិថិជននិងបុគ្គលិកផ្នែកទទួលទូរស័ព្ទ គឺស្ថិតក្នុងហានិភ័យខ្ពស់ជាងតំណែងផ្សេងៗទៀត ប៉ុន្តែក្នុងពេលបច្ចុប្បន្ននេះ ប្រព័ន្ធឌីជីថលបានផ្សាភ្ជាប់យ៉ាងខ្លាំងក្លាជាមួយការរស់នៅប្រចាំថ្ងៃរបស់បុគ្គលម្នាក់ៗ ដែលធ្វើឲ្យការងារទាំងឡាយណាដែលពាក់ព័ន្ធជាមួយប្រព័ន្ធឌីជីថល និងអ៊ីនធីណេតមានអតិភាពជាងមុន។ សូម្បីតែតំណែងជា អ្នកពត៌មានវិទ្យា, គណនេយ្យករ​ ក៏កំពុងស្ថិតក្នុងការរងគ្រោះពីការប្រកួតប្រជែងជាមួយនឹងបុគ្គលិកមកពីអន្តរជាតិដែលទទួលប្រាក់ខែទាបផងដែរ។

 

២. ប្រភេទបុគ្គលិកដែលបដិសេធរៀនជំនាញថ្មីៗ

មិនថាអ្នកធ្វើការក្នុងវិស័យណាទេ គឺវិស័យទាំងនោះតែងតែមានការផ្លាស់ប្តូរជារឿយៗរៀងរាល់៥ទៅ១០ឆ្នាំម្តង។ តួនាទីការងាររបស់អ្នកតែងតែមានការផ្លាស់ប្តូរ ហើយក្រុមហ៊ុនរបស់អ្នកអាចនឹងបញ្ចូលបច្ចេកវិទ្យានិងការបណ្តុះបណ្តាលនានា ដើម្បីតាមឲ្យទាន់នូវតម្រូវការទីផ្សារ។

ប្រសិនបើអ្នកចង់ការពារមុខតំណែងរបស់អ្នក អ្នកមិនគួរបដិសេធក្នុងការទទួកយកឱកាសដែលអាចទទួលជំនាញថ្មីៗនោះទេ។ «បុគ្គលិកដែលមានជំនាញតិច​ហើយមិនអាចសម្របខ្លួនឲ្យទាន់ទៅនឹងការផ្លាស់ប្តូរផ្សេងៗរបស់ក្រុមហ៊ុន គឺងាយនឹងទទួលបានបញ្ឍប់ពីថ្នាក់លើ» នេះបើយោងតាម ក្រុមប្រឹក្សាបណ្ណាល័យក្នុងរដ្ឋញ៉ូយ៉ក។

 

៣. ប្រភេទបុគ្គលិកដែលធ្វើការយឺតយ៉ាវ

បុគ្គលិកប្រភេទនេះ គឺតែងតែមានក្នុងក្រុមហ៊ុននិងស្ថាប័ននីមួយៗ ដែលតែងតែចំណាយពេលវេលាច្រើនពេកក្នុងការរៀបចំទិន្នន័យ ឬធ្វើការងារនានាដែលដាក់អោយ។ ឧទាហរណ៍ថា អ្នកដឹកនាំក់អោយ។ ឧទាហរណ៍ថា មេារនានាដែលមេរបស់អ្នកអោយអ្នកបញ្ចូលទិន្នន័យរបស់អតិថិជនចំនួន១០នាក់ ចូលក្នុងប្រព័ន្ធក្រុមហ៊ុន ហើយអ្នកចំណាយពេលរហូតដល់ទៅ ២ថ្ងៃ នោះអ្នកច្បាស់ជាត្រូវត្រៀមលិខិតសុំឈប់ពីការងារឲ្យហើយទៅ។

 

៤. បុគ្គលិកដែលតែងតែធ្វើឲ្យអ្នកដឹកនាំបាក់មុខ

ដើម្បីឲ្យអ្នកដឹកនាំ និងបុគ្គលិករួមអាជីពរបស់អ្នកល្អក្នុងក្រសែភ្នែកអ្នកដទៃ ក៏ត្រូវរាប់បញ្ចូលជាជំនាញមួយដែរ។ ការដែលធ្វើអោយអ្នកដឹកនាំរបស់អ្នកមើលទៅល្អក្នុងក្រសែភ្នែកអ្នកដទៃ គឺជាជំនាញទន់ម៉្យាងដែលគ្រប់និយោជក់ទាំងអស់ត្រូវការពីនិយោជិក ហើយវាក៏ជាការកំណត់នូវការសម្រេចរបស់និយោជក់ថា តើបុគ្គលិកណាដែលគួរទុក និងគួរដកចេញផងដែរ។

បន្ថែមពីលើនេះ បើអ្នកធ្វើអោយអ្នកដឹកនាំបាក់មុខ ព្រោះតែអ្នកទៅប្រជុំយឺតពេល ឬនិយាយពីភាពអវិជ្ជមានរបស់ក្រុមហ៊ុនទៅកាន់សាធារណជននោះ អ្នកក៏មិនគួររំពឹងថាថ្នាក់គ្រប់គ្រងនឹងទុកអ្នកដែរ​ ។

៥. បុគ្គលិកដែលជាចំណាយច្រើនដល់ក្រុមហ៊ុន

ក្រុមហ៊ុននឹងធ្វើការប្រកាសជាផ្លូវការ រាល់ពេលដែលត្រូវបញ្ឈប់បុគ្គលិកណាម្នាក់ក្នុងមូលហេតុហិរញ្ញវត្ថុប៉ុណ្ណោះ ដូច្នេះអ្នកអាចឃើញថា បុគ្គលិកណាដែលតែងតែជាបំណុលរបស់ក្រុមហ៊ុន ភាគច្រើនតែងតែត្រូវបានមេបញ្ឈប់ពីការងារ។ ប្រសិនបើត្រូវបញ្ឈប់បុគ្គលិកម្នាក់ដែលចំណាយស្មើរនឹងបុគ្គលិក៣នាក់ នោះក្រុមហ៊ុននឹងពិចារណាលើកត្តាមួយនេះមិនខាន លើកលែងតែថា អ្នកជាបុគ្គលិកចំណាស់របស់ក្រុមហ៊ុនប៉ុណ្ណោះ។ «ចំណាយ» មិនមែនត្រឹមតែជាបំណុលតែមួយមុខទេ ពេលខ្លះ​ វារាប់បញ្ចូលទាំងពេលវេលាផងដែរ។ ថ្នាក់គ្រប់គ្រងមិនចង់បានបុគ្គលិកណា ដែលចំណាយពេលវេលាច្រើនលើការងារពេកនោះទេ ថ្នាក់ដឹកនាំត្រូវការបុគ្គលិកណាដែលមានផលិតភាពការងារហើយចំណាយពេលវេលាតិច ។ «ដោះស្រាយជាមួយបុគ្គលិកប្រភេទនេះ គឺច្រើនតែចំណាយពេលវេលាច្រើនរបស់អ្នកគ្រប់គ្រង ដូច្នេះបញ្ឈប់បុគ្គលិកប្រភេទនេះ គឺជាជម្រើសដ៏ល្អបំផុត» បើតាមការនិយាយរបស់ Keirsey។

 

៦. បុគ្គលិកមិនសម្របខ្លួនតាមគោលការណ៍ក្រុមហ៊ុន

បរិយាកាសរបស់ក្រុហ៊ុននីមួយៗ គឺជាអ្វីម៉្យាងដែលបុគ្គលិកថ្មីត្រូវសម្របខ្លួនឲ្យបាន មុនពេលចូលកាន់តំណែងនោះ។ ប្រធានផ្នែកធនធានមនុស្ស តែងតែសម្លឹងមើលទៅលើបុគ្គលិកណាដែល មានអត្តចរិកល្អ និងមានជំនាញមួយចំនួន ដែលសាកសមអោយប្រធានផ្នែកធនធានមនុស្សដំឡើងតំណែងអោយអ្នកបាន។

 

៧. បុគ្គលិកបំពេញការងារបានលទ្ធផលទាប

​បើតាមការចេញផ្សាយនៃសារពត៌មានមួយបានលើកឡើងថា បុគ្គលិកដែលតែងតែបំពេញការងារទទួលបានលទ្ធផលទាប ច្រើនតែមានភាគរយច្រើនក្នុងការបញ្ឈប់ពីការងារ។ បើយោងតាមសម្តីរបស់លោកអគ្គនាយកក្រុមហ៊ុន SafeGraph ​ថា «ក្នុងស្ថាប័នមួយ មានបុគ្គលិកល្អៗជាច្រើន ក្នុងចំណោមបុគ្គលិកដែលបំពេញការងារបានលទ្ធផលទាប។ ដូច្នេះអ្នកត្រូវប្រាកដថា អ្នកជាបុគ្គលិកបំពេញការងារបានលទ្ធផលច្រើន នោះអ្នកនឹងអាចរក្សាតំណែងរបស់អ្នកបានហើយ។

 

៨. បុគ្គលិកដែលលួចម៉ោងការងារ

អ្នកដឹកនាំរបស់អ្នកច្បាស់ជាបញ្ឈប់ការងាររបស់អ្នក ប្រសិនបើអ្នកនិយាយទូរស័ព្ទជាមួយមិត្តភក្តិរបស់អ្នកដល់ទៅមួយម៉ោង ឬយកសម្ភារៈរបស់ក្រុមហ៊ុនទៅផ្ទះរបស់អ្នក។ សកម្មភាពទាំងនេះ ប្រហែលជាមិនជាការចាំបាច់ឬភ្លាមៗដើម្បីដេញបុគ្គលិកទេ តែប្រហែលជាចាំបាច់ប្រសិនបើដល់ពេលដែលក្រុមហ៊ុនត្រូវជម្រុះបុគ្គលិកមួយចំនួន។

ទោះបីជាយ៉ាងណាក៏ដោយ ក៏សកម្មភាពទាំងអស់នេះមិនគួរអោយអ្នកប្រព្រឺត្តនៅក្នុងក្រុមហ៊ុនណាមួយឡើយ ព្រោះវាជាឥរិយាបទ និងជាទង្វើរប្រាស់ចាកពីច្បាប់ប្រទេសផងដែរ។

 

៩. បុគ្គលិកដែលមិនមានភាពចាំបាច់ក្នុងដំណើរការអាជីវកម្ម

ប្រសិនបើអ្នកសិ្ថតនៅក្នុងផ្នែកទីផ្សារ ហើយអ្នកមិនអាចរកប្រាក់ចំណូលជូនក្រុមហ៊ុនបានទៀតនោះ វាប្រហែលជាដល់ពេលដែលអ្នកសម្លឹងទៅមើល​ឱកាសថ្មីៗនៅក្នុងក្រុមហ៊ុនដទៃទៀតហើយ។ «ក្នុងស្ថានភាពលំបាកមួយ វាជារឿងធម្មតាមួយប្រសិនបើ ផ្នែកណាមួយក្នុងក្រុមហ៊ុននឹងត្រូវបិទ ដើម្បីទប់ទល់ចំពោះចំណាយដ៏ច្រើនលើសលប់ហួសចំណូល» បើតាមការសេចក្តីរាយការណ៍របស់CNN។​